Niejs

Vaegers Dreejspan 2017

 

 

Alwin I mit zien adjudante Stijn en Erwin

Dao isse dan, de nieje hoeëgheid van VG De Vaegers, prins Alwin I. In Venlo ouk waal bekind as Alwin van Herwaarden, oetbater van Kefee De Galerie. Eine echte Venlonaer, al stónd zien weeg 34 jaor geleje in Baolder. De Baolderse Kook leet alweer 'nen tied achter um en ózzen hoeëgheid is eine echte Venlonaer dae glans guuf aan de Parade. Zienen adjudant Stijn is nao eige zegge zien rechterhand en einen echte vastelaovesgek. Adjudant Erwin in combinatie mit gezelligheid, ein baetere match is d'r volges Alwin I neet. Noow geit hae ós kómmende vastelaovend veur mit ein zekerheid; ze zien neet de flotste, maar waal de knapste.        

Adjudant 1 is in 't dageliks laeve baeter bekind as Stijn Brouwers. Gebaore en getaoge in Venlo en 27 jaor ald. Vastelaovend lierde hae as kleinen blaag viere beej 't Hane Ei, de vereiniging waovan zien elders lid ware. Sportief stónd hae zien menke beej hockeyclub VHC en werke deed hae lange tied in de horeca. Begós beej Central achter d'n tap en oetintelik achter de potte en panne. Lang werkde hae same mit d'n hoeëgheid beej Kefee De Galerie wao de basis woort gelag veur 'ne nieje standaard: gen grenze, alles meug en ein dink mót: confetti. Hiel vuuel confetti.

Adjudant 2 luustert nao de naam Erwin Cuijpers, gebaore te Venlo en noow 31 jaor ald. Opgegreujd in 't Ven lierde hae vastelaovend viere beej de jeugdraod van elf van De Moeraskwaakers. Al wet hae dao nao eige zegge neet mier hiel vuuel van. D'n hoeëgheid kint hae vanachter de bar van de Golden Tijger wao zeej allebei werkde. Dao óntstónd 'n vrindschap die tot d'n daag van vandaag besteit. Nao dreej jaor bedriefsleider te zien gewaes werk hae noow as zelfstandig online marketing regelnaef.