Niejs

Dreejspan 2019: Hoeëgheid Harold I mit zien adjudante Eelco en Johan

’t Nieje Dreejspan van Vastelaovend Gezelschap De Vaegers zien zeker gen onbekinde veur os vereiniging. En dit dreejspan is ’t laevendige bewies van det alde Venlose spraekwoord: al ’t goije van Venlo kump oet Tegele. 

 

Alleriers maar ens ozze nieje hoeëgheid, prins Harold I. Gebaore as Harold Jansen in 1973, in Tegele dus. Dao lierde hae op de Sint Jozefschoël en woort hae groeët. En Hoeëgheid Harold woent tot op d’n daag van vandaag nog steeds in Tegele, de Vaegershoeëgheid wuurt dus van wied gehaold. Hae is eine voetballer in hert en neere, speulde jaorelank beej Sportclub Irene en is noow vanaaf de bank thoes eine kinner van ’t spel. Prins Harold waas daobeej nege jaor beheerder beej Sportclub Irene en in die functie mocht hae hiel vuuël profclubs mit bekinde speulers begeleide wannier ze in Tegele kwame traine. En hae is eine vastelaovesvierder, zoeëwaal veur as achter de bar. Noow is ozze hoeëgheid alwaer hiel waat jäörkes filiaalmanager in de auto en bend branche beej Profile Car & Tyre service in Venlo en meide-eigenaer van Carwash Venlo. Ouk leuk um te weite, ozze hoeëgheid is alweer haos 2x11 jaor getrouwd mit zien vrouw Nicole Schweitzer. Döbbel fees dus dit jaor.

 

De vastelaovend is prins Harold I mit de paplaepel ingegaeve, zoeëas hae det zelf zaet. En jonk gelierd is ald gedaon, is ein spreuk die dan ouk op ozze hoeëgheid van toepassing is. Naeve Harold I steit dan auk neemand minder dan ziene zoon Eelco as adjudant ein in dit dreejspan. Ouk hae woort gebaore in Tegele en waal in ’t jaor 1992. Net as zien pap lierde Eelco zien ierste lesse op de Sint Jozefschoel en sportief aktief woort hae veur Sportclub Irene alwao hae ouk al ens prins carnaval waas. Nao de studie Sport en Bewaegingscoördinator deende hae in’t Nederlandse leger. En vanoeit Oirschot wao hae gelegerd waas, kwaam hae dökker in Rotterdam wao hae zien leefde Melanie lierde kinne. Taegeswoordigs werk Eelco veur Dopharma BV en woent hae in Dordrecht. Hae mak dus hiel waat kilomaeters um in Venlo vastelaovend te viere. In Dordrecht is hae ouk actief as keeper en bestuurslid van Fc Dordrecht Amateurs.

Adjudantant twieje Johan Tomassen mak ’t dreejspan 2019 en de femilieband compleet. Hae is namelik as vrind van Sanne de (haos)schoeënzoon van ozze hoeëgheid. ’t Kin dan ouk neet anders of ouk adjudant Johan woort gebaore in Tegele. Al deurde die Tegelse jaore neet al te lank, nao 2,5 jaor verhoesde hae naor de Blierickse Horsterwaeg alwao hae vastelaovend lierde viere beej vastelaovesgezelschap D’n Duikelaer. Oftewaal meiloupe mit de optocht, meibouwe van vastelaoveswages en ’t waere van prins (2009) en adjudant (2011) beej de jeug van D’n Duikelaer. En dan vergaete we haos det Johan ouk al in 2004 prins waas van de onderbouw van zien schoel. Hae leek te zien gemak veur tummerman, maar taegeswoordigs wet hae waal baeter en is Johan werkzaam beej Venlotech. ’t Technische bleek um toch vuuël baeter te ligge. Zoeëas gezag is hae in ’t dageliks laeve gelökkig mit Sanne, dochter van hoeëgheid Harold I .